Naniniwala si Senator Joel Villanueva na sa araw ng mismong SONA ni Pang. Duterte malalagdaan na ang isinusulong na batas na Security of Tenure. Sakaling malagdaan, magiging daan ito upang mawakasan ang kontraktwalisasyon sa bansa. Samantala, sinusuportahan din ng senador ang dalawang isinusulong na batas ng Marino party-list hinggil sa mga seafarer ng bansa.

Batay sa pinakabagong survey na inilabas ng Pulse Asia, mas maraming Pilipino raw ngayon ang nagnanais na marinig ang plano ng Pangulo hinggil sa pagpapataas ng sahod sa mga empleyado ng gobyerno at pagpapababa ng ilang presyo ng bilihin. Habang umaasa naman si Presidential Spokesperson Salvador Panelo na pagtutuunan na ng pansin ni Pang. Duterte ang kalusugan nito.

Ipinag-utos na ng Department of Transportation (DOTr) sa LTFRB na payagan nang permanenteng makapag-oprate ang mga hatchback drivers sa bansa. Kaya naman nananawagan na ang mga TNVS drivers sa LTFRB na sundin na ang naturang Department Order.

Isang panibagong karangalan ang nakamit ng isang batang speedcuber para sa bansa matapos itong magwagi sa 2019 WCA world championship. Kinagigiliwan naman ngayon ang kakaibang proposal ng isang pulis sa kanyang kasintahan sa Negros Occidental.

Kinumpirma ng pamunuan ng Philippine National Police (PNP) na nakatakda nilang itaas sa full alert status ang seguridad sa buong bansa simula bukas, Hulyo 20 kaugnay ng preparasyon para sa ika-4 na State of the Nation Address (SONA) ng Pangulo sa darating na Lunes. Kasabay nito, nakatakda namang magpakalap ng aabot sa mahigit 18,000 uniformed personnel ang gobyerno para sa SONA.